| UNN'È DDIU?... Spìssu la Fidi parrà a lu me cori, Di lu gran Summu Patri Onniputenti, Lu cercu ntra ricchizzi e li tisori, Lu chiamu e nun rispunni. — Ddiu è assenti ! — Nsìstu a circallu ccu tanti primuri, Ntra li citati, ammenzu a tanti genti, E ntra palazzi chini di splinnuri, Lu chiamu e nun rispunni. — Ddiu è assenti ! — Lu cercu ntra li cinima e tiatri Sempri affuddàti di genti cuntenti, E dda nun cc'è, nun cc'è l'Eternu Patri, Lu chiamu e nun rispunni. — Ddiu è assenti ! — Ma n-gniornu ntisi na pinusa vuci, Cci vvicinai: cc'era na suffìrenti, Ca mischinedda, avìa duluri atruci, E vvisti propriu dda Gesù prisenti ! Accantu a li duluri senza fini di dda pirsuna afflitta e cummuventi, Unni ppi ciùri cc'erunu di spini... ...Dda cci truvai Gesù Bbinidicenti ! |